अल्कोहोलिक्स अँनानिमस दारुड्यासाठी आशेचे किरण…

माझे बालपण

मी एका सर्वसामान्य कुटुंबातील आहे. माझे वडील शासकीय नोकरीवर होते. वडील शासकीय नोकरीवर असल्याने घरची आर्थिक स्थिती तशी बघता चांगली होती. परंतु वडिलांना दारूचे प्रचंड मोठ्या प्रमाणात व्यसन लागले. हळूहळू वडील दारुडे बनले. दारूच्या व्यसनामुळे माझ्या वडिलांची शासकीय नोकरी गेली. त्या वेळेस माझे अदांजे वय १० ते १२ वर्षाचे होते. बालवय असल्याने दारू काय असते? हे कळायचे नाही. परंतु दारूचे परिणाम मी लहानपणापासून अनुभवले होते. वडिलांच्या दारूमुळे आमचे कुटुंब पूर्णपणे रस्त्यावर आले. त्यामुळे समाजात वावरणे सुद्धा कठीण झाले होते. समाजात आमची इज्जत जात असल्याने मला वडिलांचा फार राग यायचा. कारण मी जेव्हा शाळेत जायचो त्यावेळी माझे मित्र मला दारुड्याचा मुलगा म्हणून चिडवायचे. त्यामुळे मला स्वतःची खूप लाज वाटायची. लाज वाटत असल्याने मी कधी कधी शाळेत सुद्धा जात नव्हतो.

तेव्हा मी आयुष्यात पहिल्यांदा दारूला हात लावला…
दिवसामागून दिवस जात होते. परंतू वडिलांची दारू काहीही करून सुटत नव्हती. त्यामुळे संपूर्ण कुटुंब चिंतेत जीवन जगत होते. वडिलांच्या दारूमुळे अनेक वाईट परिणाम आमच्या कुटुंबांवर झाले. आर्थिक स्थिती मजबूत असलेले आमचे कुटुंब दारूच्या व्यसनामुळे कंगाल झाले. घरच्या बिघडत चाललेल्या आर्थिक स्थितीमुळे मला सातवी नंतर माझे शिक्षण अर्ध्यावर सोडावे लागले. घरची जबाबदारी माझ्या खांद्यावर आल्याने मला भेटेल ते काम करावे लागले. सातवी नंतर शिक्षण अर्ध्यावर सोडले आणि मी कामाला जाऊ लागलो.
कमी वयात कुटुंबाची आलेली जबाबदारी आणि वडिलांच्या दारूमुळे मी चिंतेत राहत होतो. मी कामावर तर जायचो पंरतु कामात लक्ष नसायचे. हळूहळू कामावर जाताना अनेकासोबत ओळख झाली. ती माणसे दिवसभर काम करायची आणि रात्री दारूच्या भट्टीवर दिसायची. असे दिवसामागून दिवस पुढे जात असताना एक दिवस मी माझ्या मित्रासोबत दारूच्या भट्टीवर पोहचलो. त्या दिवशी मी प्रचंड मानसिक तणावात असल्याने आयुष्यात पहिल्यांदा दारूचा पहिला घोट तोंडाला लावला. पुढे मग मी कधी कधी लपून छपून दारू प्यायला लागलो.

दारूमुळे माझ्या आयुष्यावर झालेले दुष्परिणाम :
पुढे १९९७ मध्ये माझे लग्न झाले. लग्न झाल्यावर कुटुंबाची जबाबदारी अजून वाढली. काम दररोज भेटत नव्हते त्यामुळे मग मी ऑटो चालवायला लागलो. हळूहळू परिवारात गुंतलो. लग्न झाल्यानंतर एक वर्षामध्ये आमच्या संसार वेलीवर सुंदरसे असे मुलीच्या रूपाने एक फुल जन्माला आले. परंतु आमचे नशीब खराब होते. कारण अवघ्या अडीच वर्षात तिचे दुर्दैवी निधन झाले. मुलीच्या अचानक जाण्याने मी हादरलो. कुठेही लक्ष लागत नव्हते. ताणताणाव वाढला. मी चिंतेत राहायला लागलो. त्यावेळेस अजून माझे दारूचे प्रमाण वाढत गेले. मी पूर्णपणे दारूच्या आहारी गेलो.
आयुष्याचे वाटोळ होत असताना माझे परिवाराकडे पूर्णपणे दुर्लक्ष होत गेले. अशावेळी रोजगाराचा प्रश्न माझ्यासमोर पुन्हा निर्माण झाला. दोन दिवस कामावर गेलो कि तिसऱ्या दिवशी मला ते काम सोडावे लागायचे. कारण माझे कामावर लक्ष नसायचे आणि मी दिवसभर फक्त दारू पिऊन राहायचो. याच दारूमुळे कामावर असताना माझ्याच सहकार्यासोबत अनेकदा वाद सुद्धा झाले. त्यामुळे बऱ्याचदा मला नाईलाजाने काम सोडावे लागायचे.मला दारू सोडायची होती पण दारूचे व्यसन एवढे भयंकर लागले होते कि, दारूशिवाय माझे कोणतेच काम होत नव्हते. प्रत्येक वेळी मला दारू पाहिजे अशी स्थिती निर्माण झाली होती.
दारूमुळे घरी वाद सुरु झाले. पत्नीशी भांडायला लागलो, तिला अनेकदा मारहाण सुद्धा केली. सततच्या भांडणामुळे आणि माझ्या दारूच्या नशेला कंटाळून तिने घर सोडले. ती माहेरी राहायला गेली. ज्यावेळी ती माहेरी गेली तेव्हा वाटले कि, दहा बारा दिवसात परत येईल परंतु माहेरी गेल्यावर ती तब्बल एक वर्ष माझ्यापासून दूर झाली. कुटुंबातील वाढते कलह आणि वाढती दारूची नशा माझ्यासाठी आता जीवघेणी ठरत होती.

दारूमुळे राग फार लवकर यायचा. रागाच्या भरत अनेकांशी वाद व्हायचे. दारू पिऊन कुठेही पडून राहायचो. अशातच अनेक वेळा आत्महत्या करण्याचे विचार येत होते. समजत असलेली इज्जत पूर्ण गेली. समाजात ताठ मानेचे उभे राहण्याची लाज वाटायला लागली. पुढे दारूचे प्रमाण कमी झाले. परंतु कामाचे मजुरी मिळाली कि, बऱ्याचदा दारू प्याली. असे दिवसामागून दिवस जात होते.

अल्कोहोलिक्स अँनानिमससोबत मी कसा जुळलो?
आम्ही गावातून शहरात राहण्याचा विचार केला. तेव्हा माझ्या आईच्या माहेरच्या जमिनीवर आम्ही घराचे बांधकाम सुरु केले. परंतु माझ्या मोठ्या बहिणींनी त्यावेळी मला घर बांधण्यासाठी विरोध दर्शविला. मी नवीन घराच्या बांधकामासाठी व्याजाने पैसे काढले होते. ह्यात हे प्रकरण कोर्टात गेले. माझे लाखो रुपयाचे नुकसान झाले. हे नुकसान झाल्याने माझ्यावर आर्थिक अडचण निर्माण झाली आणि कौटुंबिक वाद यामुळे मी पूर्णपणे मनातून खचलो होतो. चिंता आणि ताणताणवातून मी पुन्हा दारूकडे वळलो. दिवसभर मी दारू पिऊन राहायचो. ह्यातच माझ्या आरोग्यावर वाईट परिणाम झाले. मला दवाखान्यात अडमिट करावे लागले. बराच खर्च तिथे आला. त्यावेळी बायको,, मुलगा आणि त्याचे मित्र सोडून कुणीच सोबत नव्हते.
आपल्या वाईट काळात आपल्याला सोडून जाणारे अनेक असतात. परंतु वाईट काळात सोबत राहणारे मोजकेच असतात. अशावेळी माझ्या संपर्कातील एक महिला भगिनी मला मिळाली. ती माझ्या आयुष्यात देवदुतासारखी आली. माझ्या दारूच्या व्यसनाची तीला थोडी फार कल्पना आधीच होती. त्यामुळे माझी दारूमुळे होणारी दशा बघून तिने मला अल्कोहोलिक्स अँनानिमस बद्दल माहिती दिली. स्वताच्या स्वप्नांना बाजूला सारून त्या महिला भगिनीने माझ्या स्वप्नाला आकार दिला. माझ्या जीवनात त्या महिला भगिनीचा खूप मोठा वाटा आहे. अल्कोहोलिक्स अँनानिमस माझ्यासाठी नवीन होते. तिथे काय असते? कशासाठी असते? याची साधी कल्पना मला नव्हती. तेव्हा नाईलाजाने शेवटचा पर्याय म्हणून मी अल्कोहोलिक्स अँनानिमसशी जुळलो कारण माझ्याकडे तेव्हा कोणताच पर्याय बाकी नव्हता.

अल्कोहोलिक्स अँनानिमसमुळे उजळले माझे भाग्य:-
ज्यावेळी मी अल्कोहोलिक्स अँनानिमस सोबत जुळलो तेव्हा कोरोनाची लाट मोठ्या प्रमाणात पसरलेली होती. बाहेर निघणे मुश्कील झाले होते. अशावेळी अल्कोहोलिक्स अँनानिमसच्या मिटिंग ला प्रत्यक्षपणे उपस्थित राहणे शक्य नव्हते. मी आभासी पधतीणे ए ए च्या मिटिंग मध्ये उपस्थित होत होतो, आधी मला हे मिटिंग करायला खूप त्रासदायक वाटत होते. परंतु दारू मला काहीही करून सोडायचे होते. त्यामुळे मी मिटिंग करायचो. पुढे हळूहळू तिथे मला रुची निर्माण झाली. कारण तिथे मिळणारे मार्गदर्शन खूप सुंदर आणि आयुष्य बदलविणारे होते. त्यामुळे मी ए ए च्या मिटिंग मी नियमित करायला लागलो.
आज ए ए च्या मिटिंगमुळे मी गेल्या दोन वर्षापासून दारूपासून पुर्णपणे मुक्त आहे. आज एका चांगल्या न्यूज चानेल मध्ये मी जिल्हा संपादक या पदावर आहे. ए ए मुळे माझे खरोखर भाग्य उजळले.

अल्कोहोलिक्स अँनानिमस मद्यपीसाठी वरदान:
अल्कोहोलिक्स ॲनॉनिमस’ म्हणजे निनावी मद्यपी. ही पुरुष व स्त्रियांची एक संघटना आहे. ह्यामधील सभासद आपले व्यक्तिगत अनुभव एकमेकांना सांगतात की, ज्यामुळे सर्व सभासदांचे मानसिक धैर्य वाढते व नवजीवनाची आशा स्फुरते. अशा तऱ्हेने सभासद आपले स्वत:चे तसेच एक दुस­ऱ्याचे प्रश्न सोडवतात आणि दारूपासून दूर राहतात.
या संघटनेत सामील होण्यास फक्त एकच अट आहे की, मद्यपाशाच्या आजारातून मुक्त होण्याची सभासदाची इच्छा असली पाहिजे. संघटनेत सामील होण्यास कोणतीही वर्गणी आकारली जात नाही. ही संघटना कुठलाही धर्म किंवा सामाजिक अथवा राजकीय तत्वांचा प्रचार करीत नाही. इतर कोणत्याही धार्मिक, सामाजिक किंवा राजकीय पक्षांशी ह्या संघटनेचा संबंध नाही. संघटनेचे ध्येय एकच आहे की, ‘मद्यापासून स्वत:ला दूर ठेवणे आणि इतर मद्यपीडीत लोकांना ज्यांना दारूपासून मुक्ती मिळविण्याची इच्छा आहे त्यांना मदत करणे. त्यामुळे ज्यांना दारूचे व्यसन लागले आहे. त्यांनी ए ए सोबत जुळावे.
श्याम एम.
मो.नं. ८७८८४८४६३३

अल्कोहोलिक्स अँनानिमस सोबत जुळण्यासाठी संपर्क
सतीश के – ९८२२९३०३६३
दिपक टी – ९८२३३१८३९९१
विनोद ए – ८७९९८३५८६४
विनोद डब्लू – ९८५०३२९९८०१