चंद्रपूर, गडचिरोली आणि यवतमाळ जिल्ह्यात मागील काही महिन्यांपासून वाघ, बिबट्याचे मानवावरील हल्ले वाढले असून, आतापर्यंत अनेकांचा व्याघ्र हल्ल्यात बळी गेला आहे. परंतु, वनविभागाकडून नागरिकांच्या सुरक्षेसाठी कोणतीही उपाययोजना करण्यात आली नाही, असा आरोप करीत गडचिरोली जिल्हा काँग्रेस कमिटीच्या वतीने राज्याचे वनमंत्री यांच्या घरासमोर घंटानाद आंदोलनाचे आयोजन करण्यात आले होते. परंतु, पोलिसांनी परवानगी नाकारल्याने जिल्हाधिकारी कार्यालयासमोर घंटानाद करण्यात आला.
चंद्रपूरचे खासदार बाळू धानोरकर, आमदार प्रतिभा धानोरकर यांनी आंदोलकांची भेट घेतली.गडचिरोली जिल्हा काँग्रेस कमिटीचे अध्यक्ष महेंद्र ब्राम्हणवाडे यांच्या नेतृत्वातील आंदोलनात गडचिरोली काँग्रेसचे (Congress) ज्येष्ठ नेते डॉ. किरसान, मिथून ब्राम्हणवाडे, रजनीकांत मोटघरे, सतीश विधाते, मिलिंद खोब्रागडे, वसंत राऊत, अतुल मल्लेलवार, दीपक ठाकरे, अब्दूल पंजवानी, नेताजी गावतुरे, सावली पंचायत समितीचे माजी सभापती विजय कोरेवार, सावली कृषी उत्पन्न बाजार समितीचे संचालक खुशाल लोडे आदींसह गडचिरोली जिल्ह्यासह सावली तालुक्यातील काँग्रेसचे पदाधिकारी, कार्यकर्ते मोठ्या सहभागी झाले होते.
