नागपूर:- येत्या एक डिसेंबरला होत असलेल्या नागपूर पदवीधर मतदार संघाच्या निवडणुकीसाठी काँग्रेस तर्फे अभिजित वंजारी यांनी गुरुवारी सकाळी अर्ज दाखल केला. यावेळी काँग्रेस कार्यकर्त्यांनी जोरदार घोषणाबाजी करत शक्तिप्रदर्शन केले. विधान परिषदेच्या पदवीधर मतदार संघासाठी महा विकास आघाडीतर्फे गुरुवारी एडवोकेट अभिजित वंजारी यांचा उमेदवारी अर्ज दाखल करण्यात आला.
भाजपकडे असलेला हा मतदारसंघ यावेळी जिंकण्यात नक्कीच यश मिळेल असा दावा काँग्रेसचे प्रदेशाध्यक्ष महसूलमंत्री बाळासाहेब थोरात यांनी केला. संविधान चौकात डॉक्टर बाबासाहेब आंबेडकर यांच्या पुतळ्याला पुष्पहार अर्पण केल्यानंतर वंजारी यांनी समर्थकांसह दाखल होत उमेदवारी अर्ज सादर केला.
यावेळी पालकमंत्री नितीन राऊत, महाराष्ट्र काँग्रेस कमिटी चे महासचिव किशोर गजभिये, शिवसेनेचे खासदार कृपाल तुमाने, काँग्रेस शहराध्यक्ष विकास ठाकरे, जिल्हाध्यक्ष राजेंद्र मुळक, राष्ट्रवादीचे माजी मंत्री रमेश बंग, काँग्रेस नेते नाना गावंडे, डॉ. बबनराव तायवाडे, सरचिटणीस मुन्ना ओझा, प्रवक्ते राहुल लोंढे आदी उपस्थित होते.
राष्ट्रवादी काँग्रेसचे उमेदवार लढविणार असल्याचे सूतोवाच केले असले तरी वंजारी हे महा विकास आघाडीचे उमेदवार आहेत. त्यामुळे राष्ट्रवादी नक्कीच सोबत राहील असा दावा बाळासाहेब थोरात यांनी यावेळी केला. काँग्रेसने पूर्ण रणनीती आखून मैदानात उतरली असून भाजपच्या चक्रव्यूह तोडला जाईल असा दावा त्यांनी केला.
रोजगार आणि स्वयंरोजगार यासारख्या अनेक प्रश्नांनी पदवीधर त्रस्त आहेत. पदवीधरांच्या समस्या सोडविण्यासाठी आवश्यक आराखडा तयार करून तो सरकार दरबारी मांडून त्यावर उपाय योजले याला आपले प्राधान्य राहील असे म्हटले एड. अभिजित वंजारी यांनी म्हटले…
