प्रतिनिधी आदित्य चिप्पावार
माओवाददृष्ट्या अतिसंवेदनशील असलेल्या गडचिरोली जिल्ह्यातील उपविभाग हेडरी अंतर्गत तुमरकोठी येथे आज नवीन पोलीस स्टेशनची स्थापना करण्यात आली. पोस्टे कोठीपासून ७ किमी आणि छत्तीसगड सीमेपासून अवघ्या २ किमी अंतरावर असलेल्या या अति-दुर्गम भागात नागरिकांची सुरक्षा वाढवून त्यांना विकासाच्या मुख्य प्रवाहात आणण्याच्या उद्देशाने ही महत्त्वपूर्ण पायाभूत सुविधा उभारण्यात आली आहे.
गडचिरोली पोलीस दलाच्या वतीने १००० सी–६० कमांडो, २१ बीडीडीएस पथके, नवनियुक्त पोलीस जवान, ५०० विशेष पोलीस अधिकारी व खाजगी कंत्राटदारांच्या सहकार्याने अवघ्या २४ तासांत हे पोलीस स्टेशन उभारण्यात आले. सन २०२३ पासून निर्माण झालेली सुरक्षा पोकळी भरून काढण्याच्या साखळीतील हे नववे पोलीस स्टेशन असून, या भागाच्या सुरक्षेच्या दृष्टीने हा एक महत्त्वाचा टप्पा मानला जात आहे.
नवीन पोलीस स्टेशनचे उद्घाटन अपर पोलीस महासंचालक (विशेष कृती) डॉ. छेरिंग दोरजे यांच्या हस्ते पार पडले. यावेळी विशेष पोलीस महानिरीक्षक (नक्षलविरोधी अभियान) श्री. संदिप पाटील, पोलीस उप-महानिरीक्षक गडचिरोली परिक्षेत्र श्री. अंकित गोयल, उप-महानिरीक्षक (अभियान) सीआरपीएफ श्री. अजय कुमार शर्मा, पोलीस अधीक्षक गडचिरोली श्री. नीलोत्पल, १९१ बटालियनचे कमांडंट श्री. सत्य प्रकाश, इतर वरिष्ठ अधिकारी तसेच स्थानिक ग्रामस्थ मोठ्या संख्येने उपस्थित होते.
यावेळी बोलताना पोलीस अधीक्षक श्री. नीलोत्पल यांनी सांगितले की, “तुमरकोठी येथे नवीन पोलीस स्टेशनची स्थापना ही या भागातील सुरक्षेला बळ देणारी असून स्थानिक नागरिकांना समाजाच्या मुख्य प्रवाहात आणण्यासाठी ही एक महत्त्वाची पायरी ठरेल.”
सन २०२४-२५ दरम्यान पेनगुंडा येथे पोलीस मदत केंद्र, नेलगुंडा व कवंडे येथे नवीन पोलीस स्टेशन तसेच फुलनार कॅम्प गुंडूरवाही येथे पोलीस मदत केंद्र उभारण्यात आले असून, त्याच साखळीतील हा पुढील टप्पा आहे.
पोलीस स्टेशन उभारणीसाठी एकूण १०५० मनुष्यबळ, ४ जेसीबी, ७ ट्रेलर, २ पोकलेन, २५ ट्रक यांचा वापर करण्यात आला. या ठिकाणी वायफाय सुविधा, १२ पोर्टा कॅबिन, जनरेटर शेड, आरओ पाणी व्यवस्था, मोबाईल टॉवर, स्वच्छतागृहे, मॅक वॉल, बी.पी. मोर्चा व सँड मोर्चा अशा आधुनिक सुविधा उपलब्ध करून देण्यात आल्या आहेत.
पोलीस स्टेशनच्या सुरक्षेसाठी गडचिरोली पोलीस दलाचे २ अधिकारी व ५२ अंमलदार, एसआरपीएफ ग्रुप-१२ हिंगोली ई कंपनीचे २ प्लाटून, सीआरपीएफ १९१ बटालियनचे १ सहाय्यक कमांडंट व ७९ अधिकारी-अंमलदार तसेच विशेष अभियान पथकाचे ८ पथके (२०० कमांडो) तैनात करण्यात आले आहेत.
उभारणी कार्यक्रमादरम्यान जनजागरण मेळावा आयोजित करून महिलांना साड्या व चप्पल, पुरुषांना घमेले व ब्लॅंकेट, स्वयंपाक भांडी, युवकांना कपडे व शैक्षणिक साहित्य, तर लहान मुलांना क्रीडा साहित्याचे वाटप करण्यात आले. वाढलेल्या सुरक्षेमुळे भविष्यात या भागात रस्ते बांधकाम व एस.टी. बस सेवा सुरू होण्याचा मार्ग मोकळा होणार असल्याची अपेक्षा व्यक्त करण्यात आली.
नवीन पोलीस स्टेशनच्या उभारणीमुळे नागरिकांनी समाधान व्यक्त करत पोलीस प्रशासनाचे आभार मानले.
