माणिकगड रेल्वे स्थानकावर विद्युत सुरक्षा सप्ताहानिमित्त जनजागृती कार्यक्रम
प्रतिनिधी गौरव मोहबे
राजुरा, दि. 13 मे 2026 :
माणिकगड रेल्वे स्थानक येथे विद्युत सुरक्षा सप्ताहानिमित्त विशेष जनजागृती कार्यक्रमाचे आयोजन करण्यात आले. सहाय्यक मंडल विद्युत अभियंता यांच्या मार्गदर्शनाखाली आयोजित या कार्यक्रमात रेल्वे विभागातील कर्मचाऱ्यांना विद्युत सुरक्षेबाबत महत्त्वपूर्ण माहिती देण्यात आली.
कार्यक्रमात रेल्वे विद्युत यंत्रणा हाताळताना घ्यावयाची काळजी, अपघात टाळण्यासाठी आवश्यक सुरक्षा उपाय, तसेच आपत्कालीन परिस्थितीत तातडीने करावयाच्या कार्यवाहीबाबत सविस्तर मार्गदर्शन करण्यात आले. विद्युत उपकरणांचा वापर करताना निष्काळजीपणा केल्यास गंभीर अपघात घडू शकतात, त्यामुळे प्रत्येक कर्मचाऱ्याने सुरक्षा नियमांचे काटेकोर पालन करणे अत्यावश्यक असल्याचे यावेळी अधोरेखित करण्यात आले.
या उपक्रमाद्वारे रेल्वे कर्मचाऱ्यांमध्ये विद्युत सुरक्षेबाबत जागरूकता निर्माण करण्याचा प्रयत्न करण्यात आला. कार्यक्रमात उपस्थित अधिकाऱ्यांनी “सुरक्षा प्रथम” हा संदेश देत कार्यस्थळी दक्षता आणि शिस्त यांचे महत्त्व स्पष्ट केले.
सदर कार्यक्रमाचे आयोजन सहाय्यक अभियंता बेलमपल्लि यांच्या मार्गदर्शनाखाली करण्यात आले असून, अनु विभाग अभियंता (विद्युत) माणिकगड यांनी कार्यक्रमाचे समन्वयन केले. रेल्वे विभागातील अनेक कर्मचारी व अधिकारी कार्यक्रमास उपस्थित होते.
विद्युत सुरक्षा सप्ताहाच्या निमित्ताने आयोजित करण्यात आलेल्या या उपक्रमाचे रेल्वे कर्मचाऱ्यांकडून स्वागत करण्यात आले असून, अशा कार्यक्रमांमुळे अपघातांचे प्रमाण कमी होण्यास मदत होईल, असा विश्वास उपस्थितांनी व्यक्त केला.
