गडचांदूर पोलिसांची मोठी कारवाई; अॅट्रॉसिटी कायद्यांतर्गत गुन्हा दाखल, आरोपींच्या अटकेसाठी हालचाली तीव्र
जिल्हा प्रतिनिधी गौरव मोहबे चंद्रपूर
गडचांदूर:
दिनांक ८ फरवरी रोजी जातीय द्वेषातून व अन्य कारणा वरुन एका कामगारावर जीवघेणा हल्ला करणाऱ्या तीन आरोपींविरुद्ध गडचांदूर पोलिसांनी अनुसूचित जाती आणि अनुसूचित जमाती (अत्याचार प्रतिबंधक) अधिनियम, १९८९ (SC/ST Act) नुसार गुन्हा दाखल केला आहे. या प्रकरणात पोलिसांच्या तत्परतेचे कौतुक होत असून, आरोपींना पकडण्यासाठी पोलिसांनी चक्रावून तपास सुरू केला आहे.
नेमकी घटना काय?
मिळालेल्या माहितीनुसार, पीडित बबन नारायण आत्राम हे ८ फेब्रुवारी रोजी आपली रात्रपाळीची (Night Shift) ड्युटी संपवून घरी परतत होते. पहाटेच्या सुमारास अंबुजा सिमेंटच्या उप्परवाही गेटजवळ आरोपी सागर ऊर्फ मारखंडी नामदेव बलकी, नितेश लांडे आणि ईश्वर गाडगे यांनी त्यांना अडवले. यावेळी आरोपींनी आत्राम यांना जातिवाचक शिवीगाळ करत त्यांच्यावर जीवघेणा हल्ला केला.
पोलिसांची भूमिका आणि विशेष तपास
घटनेचे गांभीर्य ओळखून गडचांदूर पोलिसांनी ८ फेब्रुवारी रोजी प्राथमिक गुन्हा नोंदवला होता. मात्र, प्रकरणातील जातीय छळाचा पैलू लक्षात घेऊन या प्रकरणाचा तपास विशेष तपास अधिकाऱ्यांकडे सोपवण्यात आला.
कलम ३(१)R आणि ३(२) VA: या कलमान्वये आरोपींविरुद्ध २५ फेब्रुवारी रोजी अधिकृतपणे गुन्हा नोंदवण्यात आला आहे.
दक्षता: पीडिताला न्याय मिळवून देण्यासाठी पोलिसांनी कायद्यातील तरतुदीनुसार विशेष चौकशी करून कठोर पावले उचलली आहेत.
आरोपी अद्याप फरार; शोध सुरू
गुन्हा नोंद झाल्यापासून आरोपी फरार असून, गडचांदूर पोलीस त्यांच्या मागावर आहेत. पोलिसांनी या प्रकरणात अतिशय कडक भूमिका घेतली असून, “कुठल्याही परिस्थितीत आरोपींना सोडले जाणार नाही,” असा विश्वास पोलीस प्रशासनाकडून व्यक्त करण्यात आला आहे. पोलिसांच्या या कर्तव्यदक्षतेमुळे पीडित कुटुंबाला दिलासा मिळाला असून परिसरात पोलिसांच्या भूमिकेची प्रशंसा होत आहे.
“कायद्याचा धाक निर्माण करण्यासाठी आणि पीडिताला न्याय देण्यासाठी गडचांदूर पोलीस कटिबद्ध असून लवकरच आरोपी जेरबंद होतील.”
